Ka seng jong ki nongtrei Contractor napoh ka Ri-lum Jaiñtia kaba la tip kum ka All Jaiñtia Contractor and Supplier Association (AJC&SA) mynta ka sngi Saitjaiñ kala pynlong ïa ka General Meeting ha ophis ka Kur Phawa Siangshai kaba don ha Ialong, West Jaiñtia Hills District.
Hadien jong ka jingïalang na ka liang u President ka seng u ma Welcome Langi ula kren sha ki lad pathai khubor da kaba ong ba ka seng kala ïoh lad ban ïakren shibun ki mat ba donkam ha kaba ïadei bad ka jingbha jingmiat jong ki nongtrei Contract.
Shuh shuh ula ong ïa ka Bill jong ka JJM haduh mynta ka dang sahteng la bun bun snem bad na ka liang ka sorkar kam pat siew dep wat ha kine ki sngi ka sorkar kala dep ïoh ïa ka pisa kaba Rs.336 klur tam, da ka jingkhmih lynti kum ki nongtrei Contractor ka sorkar ka siew noh ïa ka pisa, halor kane kin sa leit ban kynduh ïa u Chief Engineer ban pyrkhat sani ïa kane ka kam.
Ula pynpaw kum ki nongtrei Contract kim shai bha ha kaba ïadei bad ka Clearance Certificate ka Sales Tax, halor kane kin sa phah da ka jingthoh sha ka sorkar ban ïoh jingpynshai khambniah.
Na ka liang ka seng AJC&SA kala buh ka jingkyrpad ïa ka sorkar ban kan pyllait kloi ïa ka Bill kaba dang sah jong ka JJM, lym kumta ka seng kan sa pyrkhat da kiwei pat ki lynti ba shakhmat.