Kumba ju long shisien shisnem ka jingleh burom ia ka Maria ka kmie jong U Jisu Khrist bad ka Kmie jong ka Balang, ki paid riewngeit jong ka Shnatniam Jowai, Diocese Jowai, ha ka nohphai sngi la pynlong ia kane ka jinglehburom da ka jingiaid proseshon kaba phuh kaba phieng mynta ka sngi 31/05/2026, kaba sdang na Madan Ladthadlaboh sha Mynshem St. Theresa Cathedral, Parish Jowai, ha kaba da ki phewspah ngut ki paidriewngeit jong ka Balang Katholik ki la iashim bynta ha kane ka jingleh burom ia ka Maria ka Theisotti, ka Kmie jong u Jisu bad ka kmie jong ka Balang. Ha kane ka jingiaid proseshon ha baroh shilynter lynti sawa da ki jingrwai bad ki jingduwai kyrpad ia ka Maria ba kan nangduwai na ka bynta jong ki ba kin nangduplah shuh shuh ban shakri khambha ia u Jisu Khrist kumba ka la leh.
Ha shwa ban pynkut ia kane ka sngi da ka jingkyrkhu kaba kyrpang da ka Sakrament bakhuid tam ka Duwai, la ioh ia ka jingkren kaba sngewtynnat shaphang ka Maria da u Sohblei (Phadar) Richard Shylla, Asst. Parish Priest jong ka shnat niam Jowai.
U Phadar Richard haba kren ha kane ka sngi, u ong ba ka Maria ka dei ka, riewngeit kaba nyngkong bad kane ka ka paw ha ka sngi ka jinghiar u Mynsiem bakhuid “Ka jinghiar u Mynsiem bakhuid ha ka Maria bad ha ki Apostol” kaba long ruh ka sngi ka jingsdang ia ka Balang, ka Balang kaba u Trai Jisu u la bynshet ha ki Apostol. Nangta u ong kumba ka Maria kam shym la iehnoh ia ki Apostol, kumta ruh haduh kine ki sngi ka Maria kam shym la iehnoh bad ka don bad ki riewngeit jong ka bad kane ka jingbym iehnoh jong ka ia ki ‘riewngeit la ainam ruh ia ka “ Ka Maria ka Nongiarap jong ki Khristan”.
U Phadar Richard u ong ba ka Maria ym tang ba ka long ka Kmie jong u Trai Jisu ka long ruh ka Kmie jong ka Balang bad ka kmie jong ki paidriewngeit, kumta ia ka Dur jong ka Maria kum ka jingkynmaw ieid bad kynmaw burom ym shym la buhdur tang ha Iingmane hynrei ha baroh ki Iingkhristan. Nangta u ong ka jinglehburom ia ka Maria ka don bun rukom khamtam da ka jingduwai ia u Rossary, ka jingleit thang Mombati, ka jingleit buh syntiew bad kiwei de ki rukom jinglehburom bad haba leh kumne ym dei ba mane blei ia ka, hynrei ban burom namar ba ka dei ka Kmie jong u Trai Jisu bad ka jinglong kmie jong ka ia U Trai Jisu naduh ka sngi ka jingpynbna jong u Angel Gabriel bad ka jinglong kmie jong ka Maria ia ki paidriewngeit naduh ka sngi ba u Trai Jisu u ong ha u Ioannis Apostol” hakhmih I mei jong phi” bad ka jinglong kmie jong ka Maria ia ki paidriewngeit ym ha ka jinglongdoh hynrei ha ka jinglong mynsiem.
U Phadar Richard u pynkut ia ka jingkren jong u da kaba ong “Ka jingnguh khlieh, ka jingdem khohsiew, ka jingktah ia u dur Mot jong ka Maria kam dei ba ngi mane blei ia ka, hynrei ka long ba ngi burom ia ka bad ia kane ki paidbah ki sngewthuh haba ngi salut, ngi nguh khlieh, ngi ktah ia ki dur Mot jong ki heh ki hain jong kane ka pyrthei ym dei ba ngi mane blei ia ki, hynrei ngi burom ia ki ban shuh shuh u Phadar Richard Shylla.
La pynkut ia kane ka sngi da ka jingkyrkhu kaba kyrpang da ka Sakrament bakhuid tam ka Duwan na kti u Phadar Deimonmitre Lamare.
