Ki khun ka Seiñ Raij Jowai mynta ka sngi U Blei kila mih madan ban pynlong ïa jinglehkmen ‘Shad Sukra’ ba shisien shisnem, hashwa ba ki khun ki hajar kin hiar leit rep sha ki hali ki pynthor ban bet ïa u symbai u kba da ka jingkyrmen ban ïoh kheit ïa u kba uba sei soh.
Ka phang jong kane ka Shad Sukra mynta u snem 2024 ka ong “Hawa tip u kohngooh ïa ki hukum Adong Blai, wa man ka luti i suk ha pyrthai” bad ïa kane ka Shad Sukra la pynïaid da ka Arts & Culture Committee jong ka Seiñ Raij Jowai.
La sdang ïa kane ka Shad Sukra naduh hynnin ka sngi 6 tarik da kaba pynlong ïa ki jinglehkai drama bad mynta ka sngi kaba dei ka sngi “mih ïew”, ki khun ka Raij Jowai naduh ki longkmie ki longkpa, ki khun samla bad ki hep kiba rit ki la mih ryngkat ki riam ki khor ba itynnad bad ba iphuh iphieng.
La ïathuh ba kane ka Shad Sukra ka long kum ka por ban ai bam ai dih, ka por kaba bsa ba pjah ïa u khun bynriew lyngba ka jingdon jingem ha ka mei mariang kaba pyndap pynbiang ha baroh ki saw aiom, la ong ruh lyngba kane ka shad sukra kan wanrah ruh ïa ka jingïaieit, ka jingïatylli para nongshong shnong.
Kane ka Shah Sukra ka long ruh shi bynta na ka lad ban sei ïa ki sap ki phong naduh ka rwai ka siaw bad ka shad ka kmen, la pynsngew ruh ba ka Shad Sukra ka dei ka lad ban pynpaw pyrthei ïa ka jingphuh jingphieng bad jingriewspah jong ka Riti ka Dustur ki khun u Hynñiewtrep Hynñiewskum.
Ki khun ka Seiñraij na Madan Mynkoi Pyrdi Loompyrdi Ïongpiah Jowai kila leit mih shad ha Madan Biar ka Blai (Mission Compound) bad leit mih sha Iawmusiang ha ka por nohphai sngi, ha kaba u Justice H.S. Thangkhiew Judge High Court Shillong ula long u kongsan.
U H.S. Thangkhiew haba ai jingkren ula pynpaw ka jingsngewkmen ban iadonlang ha kane ka sngi. Ula ai khublei ïa ki nongïalam ka Seiñ Raij kiba la lah ban pynlong ïa kane ka prokram Shad Sukra kaba phuh ba phieng kaba long kum shi bynta ban pynneh pynsah ïa ka Riti ka Dustur jong ka jait bynriew.
Ha Ïawmusiang kiba ïashim bynta ha ka jingshad ki don haduh 16 tylli ki kynhun kynthup ïaka Karbi Troupe, Guwahati.
La pynkut ïa kane ka sngi ha Mynkoi Pyrdi Iongpiah Jowai ha kaba por 8 baje mynmiet da kaba pynlong ïa ka jingshad ki jingpynbyrngia kaba ki khot ka shad kper syntu pyllah ba la shim bynta da ki dong bapher bapher kiba hap hapoh ka Seiñ Raij Jowai.
