-La aiti ia ka ïing rynsan pynlong jingialang sha ka Shnong Nartiang-
Ka Seng Federation of Khasi Jaintia & Garo People (FKJGP) Nartiang Area Unit myn ha ka 12/4/2024 ka la pynhap pyrda ia ka 2nd U Mar Phalangki Knockout Football Tournament 2024 kaba la sdang ban pynlong naduh u bnai Kyllalyngkot ha madan Shnong Nartiang.
Ha kane ka sngi la wan ia shim bynta da u President ka FKJGP Sengkmie u Dundee Cliff Khongsit kum u Kongsan (Chief Guest) ha ka jingiasynran lang kiwei pat ki nongialam napoh Sengkmie kiba kynthup ia u Eldie N. Lyngdoh (General Secretary), u Elton Warjri (Senior Vice President), u Kitbotlang Nongphlang (Vice President) uba dei ruh u nongpeit (Incharge) ia ka jylli treikam ka Seng hapoh Jaiñtia Hills hi baroh kawei ryngkat bad u Khrawkupar Nongsiej, Organising Secretary.
Shuh shuh ruh la iadonlang ki nongialam ka FKJGP West Jaiñtia Hills District hapoh ka jingialam u Damian War kum u President bad u Marhok Myrboh kum u General Secretary bad ki nongialam ka FKJGP East Jaintia Hills District hapoh ka jingialam u Deihok Sumer kum u President uba long ruh kum u shongknor ha kane ka sngi bad la wan ban sakhi ruh da u Waheh Shnong Moodop u Damon Dkhar bad kumjuh ruh ki nongkitkam Shnong ka Shnong Nartiang.
Ha shwa ka jingialehkai la ioh ban pynlong ia ka jingialang da kaba plie ruh ia ka ïing rynsan pynlong jingialang (Mini Gallery) da u Kongsan kaba la pynshna sngewbha da ka Seng FKJGP Nartiang Area Unit na ka bynta ka Shnong Nartiang. U Secretary ka Shnong Nartiang u Sati Suwer ha ka jingai jingkren u la iaroh ia ka FKJGP Nartiang Area Unit da ka ba pynpaw ia ka jingsngew nguh kaba khraw ia ka Seng kaba la shna ia katei ka ïing kaba long ka jingmyntoi ia ka Shnong ban ioh pyndonkam ha kiba bun ki liang. Kumta u la kyntu jur ia ki paidbah ka Shnong ban pyndonkam hok ia ka bad ban nym leh jakhlia bad da kaba kyntu ruh ia ka Seng ban ia peit lang kumba ka Seng ka pynpaw ia ka jingkitkhlieh ban tynrong ia ka roi ka par jong ka Shnong.
U Bah Khnongsit ha ka jingai jingkren u pynpaw ia ka jingsngew sarong ban iohi ia ki kam kiba bha jong ka FKJGP Nartiang Area Unit ba ka trei da ki kam kham bun ban ia ka ktien kaba ki nongialam ki la trei shitom da ka jingkhuid bad da ka mynsiem kaba shynrang na ka bynta ka bha ka miat jong ka Shnong Nartiang jaidbynriew hi baroh kawei. U la kyntu ruh ia ki players baroh ar tylli ki kynhun ba kin ialehkai bha bad leh don akor bad da kaba shimkhia ba ka kam ialehkai phutbol ka long ruh ka lad ioh kam ioh jam ha kine ki sngi ba mynta.
Ha ka jingialehkai ka Nongkhroh Sports Club ka la jop ia ka Friendship United FC da 2-0 kol bad ka la ioh rah ia ka song pisa kaba Rs.2 lak tyngka bad ka kynhun ba wan ba ar ka la ioh rah ia ka song pisa kaba Rs.1 lak tyngka ryngkat bad ki trophy bad medal. La sam ruh ia ka Best Goalkeeper bad Best Player sha ki rangialehkai phutbol na ka Nongkhroh SC. Kum ka dak ka jingsngewnguh ka Seng ka la ioh ruh ban ai ki jingai sngewbha da ki memento sha ki referee kiba la trei shitom ban pyniaid beit pyniaid iaid ryntih ia kane ka tournament naduh ba sdang haduh ba kut bad kumjuh ruh ia u Mom Phalangki Waheh Shnong Nartiang uba la ia treilang bad ka Seng na ka bynta ka jingbha bad la ioh ka jingkren ai khublei na u Nangkhraw Rani Assistant Secretary FKJGP West Jaintia Hills.