Ka Synjuk Waheh Shnong jong ka East Jaiñtia Hills District (EJHD), ka la pynpaw ïa ka jingsngewkhia kaba jur halor ka jingkiew kynsan kynsan jong ka bai bording kaba la pynmih da ka MePDCL Khliehriat Distribution Division, kaba la ktah jur ïa ki paidbah nongshong shnong jong ka District baroh kawei.
Kiba bun ki nongshong shnong ki la pynsngew ïa ka jingeh kaba ki la ïakynduh ha ka ban siew ïa ki bill light namar ka jingkiew dor kaba khlem kano kano ka jingpynbna lypa. Kane ka la wanrah ka jingbym sngewthuh bad ka jingbym shai halor ka rukom kheiñ ia ki bill light.
Halor kane ka bynta, ka Synjuk ka dawa na ka bynta, ka jingpynshai paidbah halor ka rukom kheiñ bill, ka jingbishar bniah biang (rebilling) ïa ki bill kiba don ka dor kaba heh.
Ka jingwanrah ïa ka rukom treikam kaba shai bad kaba paidbah kim lah ban sngewthuh.
Ha kaba ïadei bad ka jingthmu ban pyntreikam ïa ki Smart Meter ha ka district, ka jingïalang kaba long ha ka 21 tarik u Lber 2026 ka la rai ba ym lah ban pdiang ïa kane ka jingthmu lada ym pat pynlong shuwa ïa ki prokram pynsngewthuh paidbah.
Ka Synjuk ka ong ba ki paidbah kim pat tip bha shaphang ki Smart Meter, kumta ka long kaba donkam ban pynlong shuwa ïa ki jingïakren bad jingïathuh paidbah ban pynthikna ba ki paidbah ki sngewthuh shai ïa ka jingtreikam jong kine ki kor.
Ka Synjuk Waheh Shnong ka kyrpad ïa ki bor ba dei peit ba kin shim khia mardor ïa kine ki jingeh bad ban wanrah ïa ka jingïatreilang kaba bha na ka bynta ka jingmyntoi jong ki paidbah baroh. Kane ka long katkum ka khubor ba la phah da u General Secretary ka Synjuk u ma Leningstar Rymbai.
