Ka Khasi Students’ Union (KSU) Upper Shillong Circle ka la pynthymmai ïa ki nongkitkam bad dkhot nongïalam ba thymmai na ka bynta ka samoi treikam 2026-2029 ha ka jingïalang ba la pynlong ha ka VTC Hall, 6 Mer, Upper Shillong.
U Samla Rangbah Raymond Kharjana, President ka KSU Central Executive Council (CEC), u la shim ïa ka bynta ban pynskhem bad pynbam smai ïa ki nongkitkam ba thymmai.
Ki nongïalam ba ha khmat duh jong ka KSU, Upper Shillong Circle kiba la shah jied ki long u Samla Pynskhemlang Syiem kum u President ba thymmai bad ïa u Samla Hopeful Born Lyngdoh Mawnai kum u Vice President.
Nangta, ïa ka kam General Secretary la bat da u Samla Nangshngaiñ Lakiang, katba u Samla Wankit Kharumnuid pat u la shah jied kum u Assistant General Secretary.
Ha kane ka sngi, la ïadon ryngkatlang ruh u President barim ka KSU CEC, u Samla Rangbah Lambokstarwell Marngar, u Organising Secretary ka KSU CEC, u Samla Cleenstar Shabong bad u Assistant Organising Secretary ka KSU CEC, u Samla Sandy Sohtun.
Shuh shuh, la pynphuh pynphieng ïa kane ka jingïalang da ka jingshah khot sngewbha ki Rangbah Shnong na ka thaïñ Upper Shillong bad Mylliem, ki Seng Samla, ki Seng Longkmie bad ki nongïalam na ki Circle bapher bapher ka sor Shillong.
Ha ka juh ka por, ka KSU Upper Shillong Circle ka la pynkup burom kyrpang ïa arngut ki nongïalam barim kiba la shongthait na ka seng hadien ka jingshakri kaba la slem kaba ki la ai kata ka long u Samla Shngainlang Sohkhlet, President barim uba la shakri naduh u snem 2001 haduh 2026 bad u Samla Wanpynshngain Kharbani, Education Secretary barim uba la shakri naduh u snem 2011 haduh 2026.