Na ka jingkiew jong ka um ha ka dam Khandong jong ka wah Kupli kaba dei ka jaka pyllang um jong ka North Eastern Electric Power Corporation Limited (NEEPCO) ban pynmih bor ding elektri, kala dawa ban pyllait ia katto katne ki bynta jong ka um, khnang ban iada ia ka jinglong jingman jong ka dam.
Kumta na ka liang jong ka NEEPCO kala phah da ka jingthoh sha u Deputy Commissioner jong ka West Jaintia Hills ban pyntip halor kane ka jingdawa ban pyllait ia ka um bad ha kajuh ka por ba u DC un ai ka jingbthah sha ki nong shong shnong kiba don shatrai jong kane ka dam ba kin long kiba husiar bad ban kiar na ka jingleit sharud jong ka wah.
Na ka liang jong u DC ka West Jaintia ruh mar mar ula bthah ia u BDO ka Laskein C&RD Block ban leh ia kaba donkam. La btah ruh ia u BDO ban shim khia halor kane ka jing pyllait ia ka um ka NEEPCO na katei ka dam Khandong, ha kaba u dei ban ai ia ka kaiphod sha ka ophis jong u DC ha kano kano ka por khlem da pynslem lada don kano kano ka jingjia.
Ka khubor na ka NEEPCO kala kyntu ia ki nongshong shnong baroh kiba don shatrai jong ka dam Khandong ba ki dei ban kiar na ka jingleit shajan jong ka wah bad ha ka juh ka por ba kin pynkynriah noh ia ki jingri jingdup jong ki, kiba don ha ki rud wah khnang ban lait na kano kano ka jingjia ba sngewsih, haba jia ka jingpyllait shuh shuh ia ka um na kane ka dam.
Kumba long mynta ka NEEPCO kala plie ia ki 7 tylli ki gate pyllait um ha ka jingthew kaba 0.30 m naduh ka 12 tarik mynta u bnai kaba la sdang ha ka por 7:30 PM. La iathuh ba lada ka jingjiew jong ka um kan dang jur, kumta yn dang hap ban pynheh shuh shuh ia ka jingpyllait ia ka um na katei ka dam. Kumta la kyntu jur ia baroh ki nongshong shnong kiba don shatrai jong ka dam ban shimkhia ia kane ka jingpyntip khnang ban lait na kino kino ki jingjia ba sngewsih.