Mynta ka sngi ka Jaiñtia National Council (JNC) bad ka Jaiñtia Students’ Union (JSU) ki la pynlong ïa ka jingïaid paidbah kaba la sdang na Madan Daimasi shaduh sha JHADC ban pynbor ïa ka Council halor ki jingdawa ba kyrkieh ha kaba ïadei bad ki jingpynkheiñ ïa ka synshar khadar bad ka jingïada ïa ka hok longtrai jong ki paidbah ha ka Elaka Nongkhlieh, East Jaiñtia Hills District.
Mar ia poi ha ophis ka JHADC, la iohi ba u (CEM) ka JHADC um shym la don ha katei ka ophis, la iathuh ba u la mih noh ha shwa ka jingwan jong ka kynhun, wat la u lah tip lypa ia ka jingwan jong ki ar tylli ki seng.
Ka jingthmu haba pynlong ia kane ka jingialang ka long ban pynpaw ia ki jingdawa ba iadei bad ka jingweng noh mardor ia u Dolloi ka Elaka Nongkhlieh halor ka jingkynnoh ba u la pynkheiñ ia ki aiñ jong ka District Council ha kaba ia dei bad ka projek tih mawshun ha Lum Syrman.
Kumjuh ban ai ka jingiada ia ki hok bad ki jaka tynrai jong ki trai shnong ka Elaka Nongkhlieh, kiba ki sengbhalang ki kynnoh ba la leh jubor da ki agent jong ka Shree Cement, ha ka jingiatreilang bad u Dolloi ka Elaka.
Ka JNC bad ka JSU ryngkat bad ki nongshong shnong jong ka Elaka Nongkhlieh ki pynskhem biang ia ka jingangnud jong ki ban iada ia ka hok longtrai jong ki trai ri trai muluk, ban pynneh ia ka jingsynshar katkum ka aiñ, bad ban pynthikna ba ym don kano kano ka bor kaba leh palat ia ka aiñ kaba lah ban wanrah ia ka jingduhnong jong ki nongshong shnong.
