Ka Dr. Mazel Ampareen Lyngdoh kum ka kyrtong na ka seng NPP ka ban ïakhun ïa ka Election MP na Shillong Seat, ha ka jingkren ïalap Election jong ka ha shnong Ïonglwit Nongjngi West Jaiñtia Hills mynta ka sngi kala pynsngew sha ki paidbah lada ka wan haka jingjop kaba don burom kan ai jingshakri kaba bha tam ïa ki paidbah jong ki 36 tylli ki Constituency hapoh ka jylla.
Ka shnong Ïonglwit Nongjngi ka dei ka shnong kaba ki khynthei ki long kiba shimkhia ïaka kam saiñ hima sima lyngba ka jingwan mih jong ki mynta ka sngi bad ka long ka briew kaba donbok ba ka seng NPP kala pynïeng ïa ka kum ka kyrtong MP, ong ka kong Ampareen.
Kala ong katba nang jam ki sngi kiba bun ki party ki dang pynsaphriang ïa ki khubor hamsaia kiba khlem nongrim, hynrei kum ki nongthep Vote ki dei ban husiar namar ka dei ka por jong ka lyer langthari kiba lah ban pynjot ïa kiba bun ba lang.
Kum ka kyrtong kaba mih na ka longïing kaba don jingthmu ban shakhri paidbah ym ban shah shakri, kala pynsngew ba ïa kane ka kam shakri paidbah la ai pateng na u kpa jong ka hala ki khun. Kala kular ha ka juh ka por ynda kan wan ha ka jingjop kum ka MP kan ïakren ïa ki mat jingdonkam jong ki paidbah jong ka Jylla Meghalaya hapoh ka ïing Dorbar Parliament ha Delhi.
Shuh shuh kala ong mynta ki don ki kyrtong kiba mih ban ïakhun ïa ka Election tang da kaba shong ha kamra bad pyndonkam ïaka Social Media, ha ka juh ka por kala kren Challenge ïa ki 5 ngut ki kyrtong ki ban ïakhun ïa kane ka Election MP da kaba ong haduh katno tylli ki shnong phi la wan ban iuhkjat? bad ki dei ban ai jubab halor ka jingleit poi jong ki sha kitei ki shnong hapoh ki 36 tylli ki Constituency bad ka kloi ban ïakhun ruh wat da ka public Challenge halor kane ka bynta.
Ha kane ka sngi la wan ban donlang naduh u Symbud Myntri Rangbah ka jylla ma Sniawbhalang Dhar, ma Comingone Ymbon (MLA), ma Wailadmiki Shylla (MLA), ma Lasting Suchiang, ma Aibor Shadap MDC, CEM ka JHADC ma Thombor Shiwat, ki MDC kiba la ai jingkren ha ka juh ka por ban pan ka jingkyrshan ban pynjop ïa ka kong Ampareen Lyngdoh ha kane ka kynti nalor ka jingdon ki paidbah kiba la wan sha ka jingïalang.
Na ka liang ka Dr. Mazel Ampareen Lyngdoh kala wan hiar ruh ha Parish Mulang Nangbah ban pan ka jingkyrshah na ki paidbah jong katei ka shnong. Kaba la kular ruh ban pynbha shuh shuh ïaki skul ñiam hapoh ka jylla ynda kan wan ha ka jingjop.
