Ha ka jingiadei bad ka jingrakhe ia ka jingioh laitluid ba 80 ne ka 80th Independence Day jong ka ri India, yn sa shah ia ki paidbah ban rung sha ka ïingsah jong u Lat ka Lok Bhavan, Shillong ha ki ar sngi lynter kata ha ka 15 bad ka 16 tarik mynta u bnai (Nailar) 2026.
Ha kitei ki ar sngi kan don ka jinglehkmen ia ka jingrakhe jong ka jingioh laitluid ka ri India ha phyllaw katei ka ïingsah jong u Lad ka Jylla.
Ka por ban plie ia ki riew paidbah ban rung ka long naduh ka por 1:30 PM haduh ka por 8:00 PM ha ka 15 tarik bad ha ka 16 tarik pat yn plie naduh ka por 11:00 AM haduh ka por 8:00 PM, khlem kano kano ka jingsiew dor.
Kin don bun jait ki jinglehkmen ki ban kynthup ia ka jingshad Bhawai jong ki nong Rajasthan bad Kalbelia, ka jingshad Dogri na Jammu, ka jingshad Kashmiri na Khashmir, ka shad Gojri bad Pahari na Jammu bad Kashmir, ka jingshad na Karnataka bad kiwei kiwei.
Yn ioh ruh ka jingpyni ia ki jinglong tynrai jong ka jylla kaba kynthup ia ka riti dustur jong ki Khasi, Jaintia bad Garo, ban pynithuh sha kiwei pat ia ka jingriewspah jong ki kolshor ka jaitbynriew ka jylla Meghalaya.
Nalor kane kan don ruh ka jingtem na ka Military Band jong ka Assam Regimental Centre ban pyni ha kine ki ar sngi.
Kan don ruh ka jingpyni ia jingthung jingtep, ki syntiew ki skud bad ki soh ki pai, nalor ki dukan die jingbam tynrai, ka jingdie ia ki tiar thain kti, jingshnkti bad kiwei.