Ïa ka prokram ai jinghikai kaba la tip kum ka “Multi-departmental awareness programme on child protection, cyber safety, drug abuse prevention and social welfare” la pynlong mynta ka sngi Thohdieng ha Khasi Pnar Secondary School, Bakur, Amlarem Sub-Division, shi bynta ban ai jingtip sha ki khynnah skul, ïa ki kmie ki kpa bad ïa ki nongïalam shnong ka thaiñ.
Ha kane ka prokram la wan ban donlang da ki nongtrei jong ka tnad Civil Administration, Police Department, District Child Protection Unit (DCPU), District Legal Services Authority (DLSA), Social Welfare Department, ka tnad koit ka khiah bad ka tnad pule puthi.
Ïa ka jingïalang la pynïaid da Dr. K. Rabha, MCS, Assistant Commissioner, Amlarem Sub-Division, la ïoh ka jingkren pdiang da ka Rita Lanong, Principal, Khasi Pnar Secondary School. Ha kaba la wan ban donlang daka Sub-Divisional Officer (Civil), Amlarem kong Vevotolu Kezo, IAS kum ka kongsan, u Sub-Divisional Police Officer (SDPO), u Inspector Arwin Phawa, Officer-in-Charge Dawki Police Station, ka kong Saralin S. Rynkhlem, Legal-cum-Probation Officer, District Child Protection Unit (DCPU), ma Lop Stevenson Khonglah, Assistant Legal Aid Defense Counsel, District Legal Services Authority (DLSA), West Jaiñtia Hills District; kong Balarishisha Lyngdoh, Counsellor, One Stop Centre, Sabah Muswang, West Jaiñtia Hills District, ki Waheh Shnong jong ka Bakur bad Dawki, ki nonghikai ki khynnah skul bad ki kmie ki kpa, katba ïa ki kyntien ai khublei la ïoh na u Denis Lamin, Headmaster, U.P. School.
Na ka liang ka Dr. K. Rabha ka ong lyngba kane ka prokram pynsngewthuh paidbah ka ïarap shibun eh ïa ki samla pule bad ki nongshong shnong ban don ka jingkitkhlieh ban ïada na ki kam sniew kiba bun jait, ki jingïadei haka imlang ka sahlang na ka bynta ki kam ba bha, ka koit ka khiah bad ka pule puthi.
Na ka liang ka Sub-Divisional Officer (Civil), Amlarem ka kong Vevotolu Kezo, kala ban jur ba kane ka prokram pynsngewthuh sha ki samla ka long kaba donkam eh ban wanrah ïaka jingshongsuk shong shngaiñ ha ka imlang ka sahlang bad kumjuh ha ki jaka khappud.
Ka la pynpaw ïa ka jingkiew jong ki mukotduma ba la register pyrshah ïa ki khynnah, ki kam leh beijot (POCSO), Act 2012 nalor kiwei de, ka la kren ruh shaphang ki jingma kiba mih na ka jingshongkha khynnah, ka jingktah jong ka koit ka khiah, ka jingduna bam, ka jingduna snam bad jingktah haka jingmut jingpyrkhat.
Ha ka technical session la ïashim bynta ban ai jingbatai da u Inspector Arwin Phawa, Officer-in-Charge, Dawki Police Station, ka kong Saralin S. Rynkhlem, Legal-cum-Probation Officer, District Child Protection Unit (DCPU), Jowai, ma Lop Stevenson Khonglah, Assistant Legal Aid Defense Counsel, District Legal Services Authority (DLSA), West Jaiñtia Hills District bad ka kong Balarishisha Lyngdoh, Counsellor, One Stop Centre, West Jaiñtia Hills District.
La pynkut ïa ka prokram da ka jingïashim bynta lang ban kylli jingkylli bad ki jubab, shuh shuh la pynshlur ïa ki nongïashim bynta ban ai jingtip lyngba u Child Helpline 1098 na ka bynta ki khynnah, Women Helpline 181 na ka bynta ki kynthei kiba donkam jingïarap bad ka One Stop Centre, West Jaiñtia Hills (6009957335) ban ïoh ki jingai jingmut. La pynshlur kumjuh ban ïa synñiang lang sha ka imlang sahlang da ka jingïatreilang jong ki tnad sorkar.
