Ki Nongshong Shnong ka Lapangap, West Jaiñtia Hills ha ryngkat ka Jaiñtia Students’ Movement (JSM) Lapangap-Unit mynta ka sngi Thohdieng 7 tarik u Nailar kila pynlong ïa ka jingïalang paidbah ban dawa pynsangeh mardor ïa ka jingrep Sohtrun jong ki Karbi ha Lum Pynthor Lapangap.
Ha kane ka jingïalang kila rai ban phah da ka jingthoh sha ka ophis u Deputy Commissioner WJHD bad kumjuh sha ka sorkar ban pynsangeh ïa katei ka jingwan rep sohtrun da ki nong Karbi da kaba pynsngew ba katei ka jaka ka dang dei jong ka shnong Lapangap.
Na ka liang ki nongshong shnong kila ong ba ki khlem ai ïa kano kano ka rai na ka bynta ki Karbi ban leit thung leit tep ha katei ka jaka ha Lum Pynthor, hynrei kitei ki nong Karbi kila wan rep khlem jingbit ha katei ka jaka bad lur ïa ka jaka da ki Tractor.
Haka juh ka por ki nongshong shnong ka Lapangap bad ka JSM kila dawa na ka sorkar ba kan pynkloi ban pynkynriah ïa ka Police Camp kaba don hapoh ka shnong sha ka jaka ha Lum Pynthor, kumba kila dep kular ha kine ki bnai bala dep. Da kaba ai por katto katne bnai ïa ki bor District ne ka sorkar ban leh ïa kaba donkam.
Halor kane lada jia ba ki District lane Sorkar kim lah ban shimkhia na ka liang ki nongshong Shnong ryngkat bad ka JSM Lapangap-Unit kin sa shim da kiwei pat ki lad ki lynti lane ban leit dalade ban pynsangeh shi syndon ïa katei ka kam rep ki Karbi khlem jingbit.
ka JSM kala kynnoh da kaba ong ‘balei ki nongïalam shnong ki ailad ïa ki nong Karbi ban leh donbor, namar naka liang ka Dorbar Shnong ruh ka khlem rai satia halor katei ka kam rep, hynrei la soi klumar da ki katto katne ki nongïalam shnong ban ailad ïa ki Karbi’.